Psalms 46
Kaem nu nangarak bagoso ko den
(Kora ko kuriang alo nunga wur bo)
1Kaem nu anananga sokel, anananga lakira,tom suen biya ikup te anananga sangukko sinar ago bagoso.
2Se umutang ko ana me nguanganakko.
Ali yukuk se duruk kutukutuk mauk ale gagi ningi kapuruk se
3gagi biyala kelaguk nirung kapuruk ale
duruk moruk yukuk,
bare ana me ko nguanganakko!
4Yu yawara bo aniso, Kaem ko wonong kako mu te,
se kariimet yu mu ko ninguru amilmilasan.
5Kaem Kualala Biya kota wonong mu te bagoso,
se kager kari me parasuwumonkowo.
Sor mununguning karogo la Kaem wonong mu sangukko.
6Se sor suen biya ko kariimet biririkimon ale nguangomon,
se ali sor supuling se nunga kariimet ago la nosokel menarukko.
Mu awuk, Kaem ko kuring pure iwita paguk, se ali biyala uririkirokko, mu te nuna nguangomon ale nosokel menarukko.
7Kaem Sokel Karogo nu nangarak bagoso,
Jekop ko Kaem nu anananga lakira.
8Tairal Kaem ura beteram ware arigalko,
nu kageraram ale sor maguwuram ware arigalko.
9Nu ali lilim la te kager menawuram,
ale daga gatu gi kulukumuram,
ale karem gi tama ningi awuram se kani namaram.
10Ale balam, “Kager menaruk se kutek mal,
ale ani Kaem mu aga ikialko.
Sor suen la te aip patawomonko, ali lilim la te nup biya aisimonko,” ma balam.
11Ikialko. Kaem Sokel Karogo mu nangarak bagoso,
Jekop ko Kaem nu anananga lakira.
Copyright information for
WSK